Puila no khulumkha norok jotono. Tripura hasteo chwng rugjaak khe maang no mui kwbaang sungo tei chawo. Chwng muya ni chimi chengwi khoklu, aa (fish), muilok, daanta saag, tei jotto mui rok no rugoi berama mui haiya khe chakhui, awandroo rok rwi chawo. Sana thangkhe chini chamungo thok kwbaang samungo phwnaangjakya. Haifano, aigeni simi no, chwng sepeng tei hoiro ni thok bo kisa kisa samungo phwnanglaiwo aa (fish) sernani tei tokhaan rok sungna bangwi.
Tabuk ni saalo, joto borok rog no bazaar o thangwi thok paiwo. Haifano pararokni baaksa buksu okra chakra rok tabukbo thok swnaamna rwngo. Aabohaino maasa okra wngkha Manga Laxmi Debbarma. Bo Chailengta parani tongnai tei bini age wngkha 55 years. Bini nok gana ni bariwo no Manga Laxmi sepeng kaiwo. Sepeng ranaani jora phuru khe sepeng karwiwui bwchlwi narwgo. Aboni ulokhe bwchlwi no satungo phwrano.
Bahaikhe sepeng ni thok karwi:
Puila khe sepengno kaham khe bailingo chogui manawo. Bini aaroni hacheng tei phon rok no chogui ma khibiwo.
Thapawo kaisa kaarai muthungui aaro sepengno yogui manawo.
Kisa yogmani ulo sepengno rwsamo khe sukhrowi manawo.
Tabuk kaisa aigeni swnaamjaak buphaang ni chekhokgo aa sepengno ma pherewo. Swkaang sepengno chekhokni kwnwikwchaaro luwoi, phaan riwoi khe buphaang bai ma pherenai.
Pherejakmung pherejakmung khe sepeng ni bwchlwi rog thok wngwi mathango. Aa thok no kaisa khuriwo yachaagwi manawo.
Tai chwng sepeng no thok swnaamna bangwi sini samungo phwnaangya. Chwng abono chakhwi mui tai muya kwran mosodeng rogo bo riwoi chalaiwo. Tai khe awan rogo tei laddu abo hai rog bo khlai chalaio. Chini saakni bagwi bo kaham hinjagu tai aro mungsa bithi rok bo sapul jaakya.
Nirokbo nogo sepeng kaina hinkhe kaimano. Sepeng bwchlwi no April ni taalo sarjago tei September ni taalo khe bwthai taiwo. Aboni ulo, November ni taalo aabono taanui maano. Nog ni kaijaak sepeng ni thok swnaamkhe chini dehor ni baangwi bo belai kaham tamonikhe bazaar ni thokrogo taamo taamo hamya sabuljaak tong chwng saai maanya. Chini baariwo kaiwui sepeng ba hoiro ni thok karwikhe aaro mungsaphano hamya kwlaiya.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.
Comments