Swkang tong Thai tei swkang achukthaibai kwrwngjak chini kamini borokrog amoswk kwrwikhe tei kisisa rang puisabai nukhung palaiphayo tei Naithok khwlai tongthothokhe tonglaijao chini kaimini borokrog. Bolong kwrwngjak nokthai buphang waphangbai gwdaljak tongthai mungsa kwrwi biyal chanani tei nungnani, amohaikhe tonglaithani jora kaisabo tongo aphuru biyal tei jwngjalbo nukjakgo tei aborog wngkha bolong komormabai tei aboni bagui swlaimung tamo nukjakha nydi.
Umor wngrwkha bukhuk khoroksa Chandithakur kamini bo bini sai thongorwo kwlaijak tei sajwla khoroksa bai khe tongjao bo nukhungo nangmani kwbangma chikon chikon aborogno karwi mungsa nangkukmani biyal abono sanai Lalmoti Debbarma,"Ani chwrai phangsini mapha songni amalni simi chini nukhungo chwng taboksak jora bol baino mamoi songwi chao tei tabok ges manwibo ges bai mamoi songchayakho,phiya bolrog chini ganagini manthok tongmani abo tabok manthoklia wngui thangkha bisi kwtal phairwk phairwk sal tal bo swlaijakbaikha tei bolong komorma bai nukhungo mamoi songui chanani bagui bol nahana manthoklia abo nahana hinkhe lama hachal 2 gonta ni lama thang kaisa abohai thaio thangui ma nahajao.
Biyangni thaio bol naha tei jwngjal rog tamokhe aro thangui bo bol nahathani amjokmung tamorog bo sao kok kwbangma,"thang kaisa thangui phaimani phung aidrop thangkhe dipor jorarogo sokphai,okgo mai kwrwikhe thangkhesi dati nokgo kiphilna hinui wansokgui ma thanglaio tei bolnaima Thai hinkhe Sepahijala bolongo forest department government ni thaio,arobo bolong naikolnai sebukrog tongo abohairog kwbangma manarog khaijakgo borogbaino bol tanwi tongphuru rogo nukphaikhe ta tandi hinjakgo,bol kwthwisi tano hinkhebo mana khaijakgo bolongni toksa toktwirog aa bol kwthwino chawi thangna nanganu hinwi obohairog. Hainibagui jwngjal kisisa boya aroni siming bol poja rujui phainpina lamabo kuchuk hacher mura bolong kheto lama,tei poja hilik bokhrok horjakgo hacham kuchukni wngkhorna gwdna naikhwlaibo maya bagwi baksa yapri kongnwi kaslei kwlaio tei arono bismarog dokho mankhe baksa nokgo phaiwi Dr. rogbo naijakya kisisa dokhomanma hinui khel khwlaiya hinkhe olo abo umor lamok phuru khe sijakgo aboni majra sak hamya wngmarog nukjakgo, tei kwlai hinui tamkhainai bolong kotormao dol kaisani tisalai nasinglai tep tep ma phaijai tei abohairogno laiwi phaiwi chini sorok nok lama pawi sokphaikhe aphuru chini dol bol bokhrokgo horwi tobonai joto dolrog lama achukgwi bokhrok ni bol poja swrapsa lama sorok kinaro berai lengmani hama nalai lengma hama manjoi himwi phailaiphio.
Kami nokthai ganao bol tangui manthoklia?
Chini umor kisisa tei ama babu song to gphuru chwngno pusina bagui kheto tei huk tei moikwthwng khwlaina tei naithokgui chanani abonk mungsa khwlaina bagui simisi kisa kosto tei songui chana baguile bol nangnai hor mwswngna nangnai abohairogni bagui aswk wansokna nangya phiya twrwk twrwk borokrog bo jani jani ajimungni bagui borokrog kashikbaikha naithokni sai teibo Naithok nukung tongthok chathok rangphuisa kwbang ajina bagui bolong tongmarogno bolong komorwi buphang waphang tanwi bolong khamrwwi Rabat buphang kailaibaikha jephuru sarkar ni saklaimungbai o lama phwunukjakha hinkhe jotono o lamanonu naisikgui ajimungni lamano mokolrwbaikha,nok Ari gana Hindi kheto nangjak Hindi mura kuchunk hindi harep agini thwngkhola Tthai naithok hindi jotonu kuplung kaijak Rabat buphang."
Nukjakha abohai jwngal bolong komorma bai chini rangpuisani bagui khachikthanibo mungsa phasing Naithok wnguibo tei mungsao chwng jwngjal nukjakgo.phiya obohai swlaimungni bagui chini borokrog wansokgui manphano mungsa lama kwrwini haikhenu tongna kwlaio tei sak kaham tongsak phan chukgwi tongsak naithok khe tongjao chini borokrog.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.
Comments