Bolongni chamung dalbidal no tongo tei chamung chajaknai dalbidal ni sinimung bo chini Thani tongna nango eba saimana bo nangwi thango tei bumungbo pokrwrwk tei saimanya wngrwrwkni bisingo bo bolongni chamungno nokhwla ario tubui kaiwi rwphaikha khoroksa khoroknwi tei khoroktham chakra rog tei o bwthai kaham kothok chaya chathok thok naithok bwthai kiting tei milik khwlai kumun wngphuru kormo khe kwrai thango hakwrai o tei o bwthaino baksa sao o bwthai ni bumung Amrita fal tei baksa hinwi sao Ram Sita fal hinui.Phaidi chwng tini o Ram Sita fal eba Amrita fal tangui hinui sinijak saimanlainai.
Kami kwrwngsani tei kwrwngsa thaio kwrwng jakno bolongni chajaknai kaham bwthai swkang manwi phaima boroni wngkha saimkha sao,"Haria kwbra Kami Takarjala amchai Kotor khobwi Kami o chini nokthai tongo Maharani Debbarma ni nukhungo nukgui phaiwi swda siniko hinui phunukgwi bedok jakphuru jotono pal rog wanajakgwi tabok bolong komorma bai twsi nuklia nung boro manwi phai hinui swngwi sao Maharani Debbarma hachwk bwkhak thangphuru sajwla manwi phaiwi nok okolokgo bwchwlwi khiklai rwmabaisi buphuru buphango buduk wmgwi kwswngwi bwthaisi chacharuru khe thaijak nukha jora kisa o nu bwthai thaiwi machana si wngkha sao Maharani Debbarma Subharani Debbarma swngmabai.
Kubun Article: Tiprasa khoroksa luku hamkhraini bagwi bahai khe samung kaham khaitong -Advocate Bikash Debbarma
Bolongni chamung kaham bwthai chajaknai tabok Subha Rani tei Manju Rani ni nukhungo bo bwthai thaijak nukha o Sita Ram fol no,"Maharani songni aroni tubui kaiwi rwphaimani chasi chabaiya tei aswkhe bwthai kwbangma thaio chanasi akaiyanu lekha baya bwthai bangmani chana nango o bolongni bwthai belaino kaham abagwi bwthai kumun thaisa tubui nokhwla kuna o khe khiklai rwkha hinkhe tabok bwthai thaiwi tongjak. Sao Manju tei Subharani bo sao obohai kokno teibo sao,Shubha Rani bini nokhai ario kairwmani hinkhe,"ang sugar ni bemar abagwi omo Amrita fol no chanai hinui tubumasi chawi naima kwkhwi hinkhe kwtwi bemar manjajakrogni bagwile kwkhwino chana nangma ba obono munkha tei kunui hakwrai kwlaikhe cha chawi tongjaota.
Khoroksa Takhuk umor 65 jotono chakra chalairog borogni umorni rog kwbangkuk tabok phano saimanma bai borogni thani swngthai wngwi tei sawi bo man thano,o Takhuk puila bolong bwthai nuk phurunu sakha, omoba Ram Sita fol c bla obo ba bolongosi tongo boroman, tabokba nukmasi komorkha bla bolongo agi chasi chabaiya chanaisi kwrwi tabokba bolong hujarsi nuklia hinkhe norog tabokni chalairogle siniyanu wngnai, sao Takhuk Megha Debbarma.
Tei baksa sao Amrita fol tei baksa sao Sita Ram eba Ram Sita fol tangui hai hinui sinijak, agini kerang kothoma de hinnai haya khe kubui Satya jug eba kubui kwthar mol tongphuru hai hinui sajakgo Ram 14 bisini bagwi bolongo bonbas tongna wngkhor phuru tamono chaja hinui sakhe o bolongni bwthaino Chao hinui borogni mung kaijakgui o fol ni mung Ram Sita chama fol hinui mung sinijakgota.Tei baksa khe Amrita fol tangui hinui sinijak abo Jani Jani mung Pharma hai kwlaio Ani bwkhaktwi hinkhe omo Sita tei Ram chalaima fol hinui sinio.
Sabo sabo le chanai nang o fol no tei bini kothok bomohai khe machajak, kwkhwi tei Rojunga bwchwlwi hai bisingo tei Rojunga bo bolongni fol bwthai chajaknaino phiya Rojunga hinkhe kwkhwiya phiya Amrita fol bwthai hinkhe kwkhwi tei motom khoro khoro wngui tongo tei Rojunga bo motom khoro nu haiphano kwkhwiya.Tei Rojunga hinkhe chikonsa tei Amrita bwthai hinkhe kotor,sao, Subharani Debbarma.
Keboba sinio Amrita bwthai hinui tei keboba sao Ram Sita chajaknai bwthai hinui phiya soi simungo hinkhe bolongni manma chajaknai bwthai hinui si kubui sinimung kwlai o.Tei kubui kerang kothoma bai gwdalwi sajak hinkhe Sita Ram chalaima bolongni bwthai hinui mung kubui wngkhana hinwi wansokgo.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.
Kommentare