Tripurani kwbangma bukungbara motha rogni bisingo Kokborok haiyakhe Bru Kok sanai o Reang bosong rogbo khop jago. Reang bosongni naithothok Hojagri mwsamung hayung (world) o sinimung manwi tongo. Reang hinkhe Bru hinwi no sakno sinimung rao. Reang bosongni kwbangma sub-groups tongo - Chorki, Meska, Molsoi, Ateto, Nsha, Yakcho teibo kwbangma tongo. Reang bosong Bharat haktor tei kisa misa Bangladesh o bw tongo. Tripura o Bubagrani molni srisitini simino Reang bososng rogni laibuma tongo. Aghio Tripurani simino kwbangma thaio huk chate chate borog baksa ba Mizoram hasteo shogui kha baksa ba Bangladesh kwbuni Haktor o sakja bai kha.
23 bisi romui kwcham Bru Reang rogni Khakhamjaknai Kothoma
Tripurao Reang bosong ungkha Hasteni bukung bara rogni bisingo ulsa (2nd) borok kwbang. Mizoram hasteo bo kwbangma nw tongo Reang Bru bosong rok. Haiphanu salsa September talni 1997 bisio jaty danga ungui thang kha Reang tei Mizo rogbai. ADC eba Autonomous District Council sanlaima no chajak liya ungui Mizoram ni borok rog Nok-Huk soksa mabai kharui ma phaikha Bru bosong rok Tripura Hasteo.
Tripura hasteo ma tongra phaikha 6ta thaio - Naising Para, Ashapara, Hezachhera, Kaskau, Khakchang Para, Hamsapara- Kanchanpur tei Panisagar Bru Rehabilitation khaiwi.Tripura haphang tei Mizoram haphang kwdwkma bisi romui borogno yachakya ungma bai biyalo kwlwk kha Bru bosongni luku rok. Bwini nogo thangui kisa misa samung khaiwi rangpuisa aji ma baino kwrwngui ma tongja bakha biyalni mari bai.Twi nungthai kaham kwrwi, School kwrwi tei mungsa phanu chep manlai jaliya haphang ni bukhak twi.
Cpim Haphang tongphro tesa Mizoram hasteo kiphilgui rohor na naiphi kha. Kiphilgui rohorna naima bangui Bru bosong rogbo khorang tisa laikha. Sanmung sanlaikha Bru bosong rok bo - Chwngno ADC swnamui ma ronai tei chamung,nungmung tei kaham chep ma ronai hinwi. Phiya Mizoram Haphangbai rwngkhlai jakphima bai baksa Tripura hasten kiphil thangbai phikha. Haiphanu kwbang kwk borokno Tripura hasteo no tongwani hamkukma bangui kwchai tong rwk baikha. Haino hai 2009 bisio tesa kiphil phaina bangui Mizoram haphang kwbangma ringkhlai phi phanu thang liya Bru bosongni luku rok. 5000 ni swk kiphil thangbai phanu 32,000 swk kwchai tongrwk baija kha.
Bru Tongraiphanai rogni bangui Kasumung
Tripura Hasteo Bjp haphang kwtal phaimani yakulo Bru bosongni luku rogno tongthai kwtal swnam ronai hinwi sakhlai kha. O sakhlai mungno chajak ya ungwi kasu laikha- Joint Movement Committee (JMC) tei Nagarik Surksha Mancha ako rok. Joint movement Committee o tongo amchaini Wansa tei Mizo bosongni borok rok. O kasulaimungni patilaimungo khoroksa fireman Biswajit Debbarma mungui thwija kha bwthar jagui. Bru rogni tongthai rophijakmano kasumung nwkgui ganao bacha kha Tipra motha (The Indigeous Progressive Regional Alliance) Tripura Bubgra Pradyot Deb Barman bai songsajak motha, tei Bukhung bara hinwi Fireman Biswjit Debbarma bwtharo hinwi TPF ( Tripura People Fornt) song khorang tisa kha Patal Kanya Jamatia bai songsajak motha.
Bru bosong rokni kwtal Nikuma
Tripura Hasteo tongraphainai Bru bosong rogni jungjalno nugui Tripura Haphang, Mizoram Haphang tei Central Haphang 16th April, 2020 koklamni bangui achok laikha. Central Home Minister Amit Shah kokrwmani yakulu Borogni bangui 600 crore ni rangni packages bw swnam jakha. Bru bosongno Nok,Thai, Chamung tei Talbrum rwjaknai magunangno mairung. 19th April, 2021 salno Laibuma sal - Mizoram ni tongra phainai rokno kwtal nikuma rojak kha. 232 ni nukhungni borokrok no Tripura hasteni Dhalai amchaini Bongafa tei Hadukolok o kwtal tongthai tei nikuma rojak kha. Tei 1638 nukhungni borok rogno hinkhe North Tripura ni kainwi thai - Wainbuk Chhera tei Ranipuro tongthai rojak phinai.
Tei 9ta tahini bangui Tripura Haphang Koimung bwlai rohor kha Central Haphangni thani. Bru bosong rok nok, nokthai, twi tei current,hai chamung nungmung rogni chhep manbai jakha.
Kwcham tongthaini simi ora belai kheno tongthothok khaiwi ma tongkha hinwi salai jakha Hadukolok Kami ni luku rok. Twi hundi, chamung nungmung hindi aghini saile belaino hamkha hinwi salai jakha.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi Sansthani chubamungbai.
Comments