“Kaham chadi, kaham tongdi, kaham sadi” 19th august 2021 bisini simi holong thong kaiwi phiyogwi rwmani Hamkrai Naikol Bodol. Chati kwthar mwswngmani bisingtwi Tripura ni Borakha amchaio khorok chidok (16th Members) ni chubachubai yapri naharkha hoda ni sijak nukjakrog. Hamkrai naikol bodol wngkha Rehabilitation centre and counselling Unit. Rehabilitation Centre Tripura ni kaichar hangkhorni bisingo kai brwi hangkhorni kephek nungnai eba drugs chanairog tongo. Hangkhorogni bisingo tongo Sepahijala, Dhalai, West tei Khowai. Phiya o kai brwi hangkhorni bisingo jotoniswlai kwbangma wngkha West District o. abono karwibo jotoni swlai kwrwi nukhungno kwbangkuk hwnwi kokthum. Jotowi o Rehabilitation kephek nungnai tei drugs chanairog tongo khorok snichinwi. O Rehabilitation kephek nungnai eba drugs chanairogno mwthwngmung, Carrom, Ludo, Counselling, Volleyball, meditation tei yoga akorog khwlairwjago. Sana thangkhe, jotowi khoroksni kephek nungnai eba drugs chanairogno naikolwi tongo Hamkrai Naikol Bodol.
Hamkrai Naikol Bodol aro tongnairogni kokno khorogo wansugwi ri subjaknai machine ni bagwi koimung rwmani Tripura ni TTAADC haphangno. O koimung rwmani yagolono TTAADC haphang gosiwi naharo. Abohai Rehabilitation o tongnaino je nangmani chubachu rwnai jeswk mansak hwnwi kok rwkha TTAADC haphang. Tei khaksa bwkhak khorok snichinwi tongnairogni bisingo baksa baksa rwng swrwngnairog tongo tei baksaba amjokmung rwnairogbo tongo. Aro tongnairog kebo jwngjalo kwlaiyatwikhe wansukgwino yapri eba sep sab rwjago. O sep ni bisingo baksa amjokmungni jora amjokmung rwnani, rwng swrwngmungni jora rwng swrwng rwnani tei baksanoba ri subnanibo phwrwngjago Hamkrai naikol bodolni khoroksa tangphang Budi Debbarma hai hwnwi sakha. Dopha ni jwngjal joto bwkhaktwi naisigwi naikhe jwngjal kuplwng. Saboba nuksinai, saboba phiyoksinai eba saboba dophano sochawi tisasinai. Nwng ang bui hwnwi tongwi chuklaiya tabuk tei joto dopha ni sijak nukjak eba wansuk kwrwngrogno bwskango phaiwi himnani nangsinai. Jora kaisa Tripura sikla siklirog kephek manwi eba drugs chanairog kwrwi tongmani. Phiya tabuk boroni phaio o hamya mwnwirog? Tomung o manwi hamyarog kebo phalwi tongkhe kami amchaio sijakrogno aboni lamno muthubwi manai. Tei kami amchaini NGO bodolrogno aborog mwthaksugwi manai hwnwi kok kwcharkha koklam panda Hamkrai Naikol Bodolni Secretary Sanjib Debbarma.
Yamrok trustbo a salni koklam pandao manjukha tei chubachu rwkha. O trust ni twiphang Sabir Kr. Debbarma khoroksa bisi kwdwkma romwi hoda hamkraini samung tangnai. Bini NGO ni bisingtwi sakbaithang Hamkrai Naikol Bodolno bolaikha tei borogni saktharmungno belai hamjakha. O samung kubui wngkha nini Triprasa siklarogno mwthangmungni kaisa lama kotor. O lam kotorno jeswk manjak ang chubachu khwlainai hwnwibo kok rwkha. Tei koklam pandao sakha norog joto aro tongnairog wansukdi o rehabilitation sokphaima aboni kokmangno wngkha norog tabuk dakti daktino hamsinai.
Norog aro hamya manwi chawino sokphaikha. Norog chawi sawi mankha o manwi bahai tei bobohai? Norogbo o manwino yakarna muchungo haiphango yakarwi manya. Norog abo yapri naharna swkangbo sawi mano o drugs manwi hamya. Abo chakhe tei yakar manya hwnwi. Haiphano chamani ulobo eba drugs naharmani ulobo namang tongo. O drugsbai tomung kwbangkhe kubulkhe tei kwtal langmao kiphilwi phaiya. Norog kebo aswk kwbangkhe kubulsukyakhu o drugsbai aboni bagwino tini o koklam pandao norog achukjak. Aboni bagwi norog khao chongwi nahardi sak saichung ang swlaijakha hwnwi tei norogni khorogo wansukna nangnai ang tabukle hamsukha hwnwi. Ang tabuk o rehabilitation ni hamwi thangmani ulobo kubun chanairognobo swlainai hwnwi. Abo kaisa sakham nok hai aboni bagwi abono norogni bagwi thangsanani lama hwnwi kok kwcharkha Tripura Actress Biva Jamatia.
Kok kaham kwcharma Hamkwrai Naikol Bodol ni:
1. “Chamung kahamno chadi chamung hamyabai sakno ta dera rwdi”
2. Sak kaham tongkhese nukhung kaham wngnai, nukhung kaham hunkhese kami amchai hamnai. Kami amchai kaham tongkhese dophao hamkrai phainai dopha hamkrai phaikhese dopha yoksamung sokphainai.
3. Nwng kwrwi khe nini nukhungni hamkrai kwrwi, Nwng kwrwikhe chini kamini hamkrai kwrwi.
4. Nwng sai de man? Nini langma chini dophani bagwi bwswk nangkukmani?
‘Drug Yakardi, thangwi tongdi, Dophao khakchangma tubudi’
"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"
Comments