Sena wng kha srisiti ni siming palai jak gwi faimani kaisa ter/puja. Sena garia puja ni horsini ni yagulo palai jak go, O sal go baba garia no bidai rojak go tei baba garia ama mailuma bai ama khuluma no nukhung no twibar na bangwi tei hamkhrai ni bangwi chong gwi kwlang gwi thang go. O salno no hino sena. Buisu/ garia puja choitra maas 30 tarik eba april 14 go palai jak go tei aboni horsini yagulu 21 april eba 7 boisak go khe sena palai jak go. O buisu bai sena kwchar go baba garia no twi gwi kami kami berai lai go Jamatia dopha ni borok rok tei baba no twibargwi tong go. Aboni yagulo baba ama mailuma bai khuluma no twibar yafar kwlang fiya bo jotto thai go no tong go tei baba no je thai go tong gwi bo khulum gwi manai tei baba ni hamari bo mago hwnwi borok rok ni pwito.
Khwna ekhe sena wng nai laha humani horgo baksa khe ba mwtai baba garia ni loge, baksa khe ba buisu ni siming sena jora kwrwng gwi baba ni loge tei baksa khe ba nogo no baba garia ni mwng no nagwi hopwng kirton rogwi ailai go. Sena ni phuwai go pwila swkang Tripuri tei jamatia dopha ni borok rok khum khaklai gwi dogwlam go tei teilam go berlai tego naithothok khe motom sarogwi nukhung no. Jamatia dopha ni borok rok je thai go mwtai kaigo, o thai go mwtai baba garia no bidai romani yagulo, sena palai jak go ama mailuma bai khuluma ni mwng gwi. Baba garia chongwi kwlang kha ama mailuma bai khuluma no nukhung no naikol gwi kaham khe tong rona bangwi, Ama mailuma khe ba nukhung go chamwng nungmwng rogwi nukhung go hamkhrai tobonai eba ronai ama tei Ama khuluma wng kha kamwng chumwng rogwi nono sobol gwi tong ronai ama. Chamwng, nung mwng, richu tei tong thai wng kha langmani jotto ni slai nang kuk mani. Abono borom rogwi no Sena ni salgo ama mailuma bai khuluma no pailai jak go.
Ama mailuma bai ama khuluma no pailai na bangwi gwi nang mani manwi rok wng kha Mairung, mairung berajak nai tukusa, khul, thalwi bwlai, khwtwng, awan bwthai, awan bora, piyas baja, khum, bwthai, dupkathi, mumbati, twi kwthar, tulsi tei ri kwthar bai khe nok bising go bangchai swnam jak go. Jugal baimani yagulo ama mailuma bai khuluma no achuk thai rojak go tei awan bwthai thai tham khe ama mailuma bai khuluma no rojak go, gana go awan bora bai piyas baji khe mwtai khoroknwi no rojak go, robai mani yagolo je chuktwi ama no chini nogo faigwi achok thai nafai jadi tei posa chafai jadi hwnwi borom rogwi posa barok lai jago, brokni khago kwbwi no mwtai faigwi nogo hafai mahai matong jak go, tei nukhung ni hamkhwrai ni bangwi maa ni thani yachak jakgo. Posa barok bai mani yagulo jaiti gusti takhuk bukhuk baksa khe maa ni posa no chalai jago tei kaham khe tong lai bai jagw, Chamwng nungmwng chalai gwi nunglai gwi hatete khe.
O sena ni sal go jotto nok bwrwng bwrwng no awan swnam lai go tei okra chwrai jotto khoroksa tei khoroksa ni nogo thang lai gwi awan bilaigwi chalai tego bodol bodol khe. Aro bising go awa bora wng kha jotto ni slai nang kuk mani. O awa bora no mairung no kwsab khe fechegwi twi ojogwi rogwi budul budul khe dulgwi sergwi swnam jak go. O awan bora keserem wng rwrwk thok rwrwk si. Tei sena ni sal go awan bele tei dalbidal awan swnam jak go. Okra chakra rok no khe ba o salgo khulum gwi borom marigo tei brok awan yafagwi roho go chwrai rokno.
Tripuri dopha rok wng kha nokbar bongbar, twima twisa, hathai haphwng bai gwdal gwi tong nai bosong, brokni pwito jotto thai go no mwtai tong go. Tei o dophani borok rok jotto nonw borom rogwi tong go.
O kokbwkhal ni bising twi sena boforo tei bahai khe tamoni bangwi pailai jak norok saiman khwna, laibuma go sena no twi gwi o kokbwkhal go karjak gwi rok tong khe nirok je sima jora twi comment khai bai jadi. Haikhe no chwng khoroksa tei khoroksa salai gwi chini laibuma no silai nai tei kuchuk go tisa lai nai. Ker kwthar kwbwi baba garia puja tei senna wng kha tripuri dopha rokni kaisa srisiti ni siming sinijak gwi faimani eba tripuri dopha rokni sinimwng. Hambai.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.
Comments