Jotto Tripuri bosongono Hojagiri aghini siming tabok swk jora palai jakgwi phaikha. Hojagiri kokthai achai kha Hojag rwmani sal ni bising twi. Hojagiri Tripura haste ni kaisa belai kheno kotor Ter eba tongthok sal. O Hojagiri ni salo Ama Mailuma Khuluma no khulum sajak go nokbwrwng bwrwng no bisi go waisa Asin (October) ni taal o.
Borom gwnang Chitta Debbarma, Purnini jamatia tei Mayungtwisa kamini borok rok sakha Hojagiri Achaimani Laibuma eba yaphang yarwng wng kha Maharaja Trilochan ni siming. O hojagiri ni bising twi salsa salgo Maharaja proja rokno hojag tongrona bangwi, Haste no nasrenai eba sekna nai rokni yakni bachok rona bangwi tei hojag khe tongmani bising twi nukhung hamkhrai tei Haste hamkhrai ni bangwi bo Hojag belai kheno nang kuk mani phwrwng na bangwi se o Hojagiri Achai kha. Boni bising twi proja rok tei kamini borok rok bwswk hojag tong nainani bangwi. Maharaja Trilochan 54 bar haste bwini yapha go yakagwi maromani laibumano wansokgwi, haste no bwini yakni kaso na bangwi se o Hojagiri kaina cheng jak kha eba dophano sisarona bangwi se. O tongthok Hojagiri salni bangwi Maharajara kaisa raida swnam kha, O Raida wng kha Rajdorbar go tei kami go khe kami chokdiri ni nogo Ama mailuma khuluma no posa barok bai mani yagulu, Hojagiri ni horgo manwi khunwi bwsa bisi Ata kathi, mwikwthwng thai kwthwng rok khok wani nokphang no mwngsa birmaan go khikhlai ya khe tei nokphang saimanya jaat khe. Fiya o khok mani manwi no chagwi mapaiya, chagwi paikhe ba sikok si wngwi paikha. Haini bangwi chokdiri ni nogo eba Rajdorbar go se tunwi maroi nai tei swbani no twma khokgwi tobo kha bw masaigwi nai. Aboni yagulo khokjaknai nokphang rajdorba eba chokdiri nogo joribana rogwi manwi tikhok gwi mananai. Tamoni hinmale o din go hojag khe tong d hwnwi sajak gwi bo hojag khe tongwi mayani bising manwi khok jak mani. Oro jaga Maharaja buchi rogani naimani khe nwng nok ni manwi hojag khe tong d sajak gwi sasi hojag khe tong maya khe manwi khok twlang jak gw, omo tabok chokdiri go eba rajdorbar wngwi se phirok gwi magw haya khe phirok gwi de mankhamu. Bwi nini haste no sekgwi nakhe phirokgwi de mankha mwng. Nwng hojag tong khe nini hacheng kolsa sasi bwi namaya. Khoknai ni bangwi bo Raida tong gw khoknai Jodi khokgwi tongphru nokphang bai manjak kha hinkhe khiko Lota bai twi khajak nai. phiya Jodi nokphang o hojagiri ni salo khokjakya khe tongwi mankha hinkhe Nokphang hojag gwnang hwnwi sinimwng manai tei omohai nukhung ni borok rok no nukhung no kaham khebo twibar manai tei proja bo kaham wngo. Kaisa Haste no nawk gwi tongna bangwi Maharaja rok kwbangma mawansok go tei raida maswnam go. Haini bangwi Maharaja ni proja bo tei borok rok, khoknai bo rwngna nangnai tei nokphang bo belai khe no Hojag tongna nangai. Omohai khe Maharajani wansokmwng bai tei raida bai proja rok tei borokrok kwbangma swrwng mwng magw nukhungni hamkhraini bangwi tei haste no seknai rokni yakni bache rona bangwi.
Kubun Article : Maharaja Govinda Manikya jorani kwbwi kothoma
O Hojagiri ni sal go Ama Mailuma Khuluma no khulum jakmani hinkhe Ama mailuma kheba chamwng ronai mwtai, nono kholopgwi borom rogwi richu ronai hinkhe khuluma, noksu wng kha nokno songsa gwi torinai mwtai, chwng thangwi tongnani hinkhe o 3 ta belai kheno nango chamwng nango, richu nango tei tongna bangwi noknango. Haini bangwi Ama Mailuma Khuluma ni mwng nagwi tei noksu no khulum sagwi O Hojagiri palai jakgo. Tei o puja rona bangwi nangkuk mani manwi rok wngkha Lota (godd), Khul, khum, laisok, tulsi, bwtai 5 por.
Ang khakhlai go norok jotto o kokbwkhalni bising twi kwbangma swrwng mwng mankhwna tei siya nobo saimankhwna. Hojagiri no twigwi angle aswk no saimajagw nirok ni thani Hojagiri no twigwi teibo saiman mani tong khe comment khai di chwng khoroksa tei khoroksa no chobacho khlailai mani bising twi chini laibuma no teibo kaham khe saimanlai nai. Hambai.
Comments