Jamatia Hoda go bebak gwi 18 khan Moyal tong gw aro bising go Maradi moyal wng kha Tripura hasteni Gomati District go. Bisi bwrwng no Jamatia Hoda bisi go waisa thung pairoi Moyal gonw Moyal ni hamkhrai ni bangwi choba khlai go. Pwila Ker Kwthar kwbwi Baba Garia no Chati sokgwi o choba cheng jak kha. O choba go fai manjak faikha Hoda Okra Padha Lila Jamatia bai Pulindra Jamatia, Kherfang Upadeshta Jamatia, Pachai Asol Hari Jamatia bai Bipad Mangal Jamatia, Baba Garia Mission ni President Tripur Jamatia, Moyalni jotto kamini luku chokdiri tei Hoda ni Dharma committee ni borok rok Puspa kumar Jamatia, Ratna Jamatia tei kwbangma faimanjak faikha. Dharma no twigwi Jamatia Hoda raklai gwi tong mani ba o choba go brok mwtai kotor Baba Garia ni mwng no loplai jagwi cheng jak kha.O choba ni bising twi kaham, hamya tei bahai khe hamlai gwi chalai gwi manai tei fainai sal ni chwrai rokni hamkhrai bahai khe wngnai sanani jottono seb rojak go. O choba 26th september ni sarik go eba Horgo Maradi moyal Mayungtwisa 2 Number kamini chokdiri kanai lal jamatia ni nogo Jamatia Hoda ni wansokmwng bai Hoda tei moyal ni hamkhrai ni bangwi choba khlai jak kha.
O choba go Puspa Kumar Jamatia sakha chwng kaham khe tong na hinkhe Ker Kwthar Kwbwi ni bising twi Baba Garia ni Raida no makhwna nai tei mapalai nai. Bo sakha tabok ni sal go kaijak eba nalai mani dalbidal wngwi thang kha kaisa kheba buma bufa kok swng laigwi kaimani, tei kaisa khe ba Rada Radi nalai mani tei kaisa kheba kwkak kikik nalai mani, fiya Halog chaya tongmwng chaya khe nalai mani nokhe makaso lainai eba rogwi manarwk lai nai chwng jamatia Hoda song fainai salni chwrai rokni hamkhwrai ni bangwi. Lekha pora kwrwng rok lekha simi rwngwi thang mabai wngya sakni dopha, sakni sinimwng tei sakni dharmo nobw mahamjak nai. Tabok ni kwbangma chwrai tong go chamwng hamya, nungmwng hamya drug hai nesha naigwi tong nai rok abo rok no Dharma ni laga go toboi mankha hinkhe hamrogwi manai.Tei jotto kamini ochai rokni raida bo je fwrwng jak mani hai khe jotto nino kwbwi wngani nang nai. Tamoni hinmale Ochai roksi Dharmo no narwk nai. Mwng gwnang Puspa kumar jamatia sakha Jamatia Hoda khamani 430 bisi wng kha. Mwtai no borom rogwi ker kwthar no twi gwi matong lai nai, okra chakra je saikwlang mani kok rok no makhwna lai nai . Chagw chaya naigwi je chamani nokhe ba narwk gwi je chaya no he ba khibi gwi bahai khe kaham khai gwi manai abo no si manai lai nai. Sakni ni no sak kaham khlai lai khe si bwi jotto nini dopha no borom ronai tei hamjak nai. Je jaga fa thang d jefa khai di fiya nije ni sinimwng, nije ni dopha tei nije ni Dharma no tapok di.
Mayungtwisa kami ni Ratna Sadhan Jamatia choba go pwila no dopha go birmaan nangwi tong mani no twigwi kok sakha tei bo jotto no hambai rikha kok sana bangwi seb manmani bangwi. Bo sakha pwila birmann wng Dharmo kesep mani, bo sakha chini chwrai rokno pore robai laha rwngsa bailaha sisa robailaha fiya chini yaphang yarwng bahai bw mwtai atai no twibar gwi, twma khe bw dopha bofroni sing khagwi, bahai khe bw buthu aswk wngwi tong bono wansok gwi naicho gani o jaga khe sok gwiya wng tong gw. Sokgwiya ni bising twi no twma wng kha, bwi fatar go kwbangma dopha tong go, Dharmo tongw, baksa kheba Dharmo si samwng nang jak ya tei kwbangma dharmo ni borok tongw christain, Muslim, Hindu tei kwbangma twibarnai Dharmo tong gw, ekhe brok faigwi borok ni tongmwng chamwng Richu no twigwi kok pir go. Hinkhe chini o 430 bisi rogwi chini je laibuma cholei tong mani jagao dalbidal birmann faigo.
Kubun Article: Nali pama bithi tamo saimandi
Sagani thang khe chwrai rok sakni yaphang yarwng no kaham khe khurgani rwng ya eba sanai kwrwi haini bangwi bwini dopha bwini eba Dharmo ni borok bai kok salaite salaite paithak go chen kha hinkhe twlwk twlwk sakni nonw chaya hi wansok gwi sakni no yaka gwi bwini Dharmo, bwini tongmwng chamwng no nagani chengw. Fiya chini Dharmo chini tongmwng chamwng no kaham khe sai mann khe chini si tei bo kahamkuk. Tei jotto ochai khlai tong nai rok bo kaham khe kwbwi khe matong nai tamoni hinmale jefa dharmo no narwk gwi tongna bangwi ochai rok si kaham wng na nang go haini bangwi je jamatia dopha go ochai tong nai rok kaham khe raida no twigwi fainai chwrai rokno kaham ni lama funuk di tei pal baksa wng na nang nai. Ratna sadhan Jamatia teibo sakha Jamatia dopha rok bahai khe cheng bo raja ni siming cheng kha. Bo sakha Maharaja Amar Manikya Bahadur ni bwsala Rajdhar Manikya ni siming Jamatia sinimwng mankha tei boni rajato bisi wng kha 1589-1600 khristapdo. Jamatia rok wng kha kwbwi baino Raja no hamjak nai tei mwtai swk khe nuk nai borok rok. Bo paithak go sakha chini chwrai rok rwng swrwng khe sisomai gwi swrwng na wng thwng, tei drug addiction , AIDS bemar rokno bahai khe kaso lainai aboni sepbo manahor lainai tei kamini Lama, rwng nok rwngswrwng rok nobo teibo kaham makhlai lai nai.
Ang khakhlai go omo hai choba jotto kami, jotto Moyal go bisi go waisa wng khe belai no chanai fainai chwrai rokni, dopha ni bangwi tei rwng swrwng nai rokni sojak ni bangwi. O kokbwkhal ni bising twi norok kwbangma Jamatia Hoda ni choba no twigwi saimankhwna. Khahlai go norok jotto o kokbwkhal chajak bai khwna tei nangkuk mani wng jak khwna hwnwi. Hambai.
.
Comments