Tripura ni kami achairogo tabuk twrwk twrwk khwlaiwi sakni phanbai bahaikhe ajiwi man aborogno twiwi yapri selaimani nukjagwi tongo. Thumsakhe sana thangkhe sak saichung bahaikhe baniya songchawi man. O lamano tabuk kwbangkukno sikla chalairogni bisingo saiwi naharlaijak. Aboni bisingo amchairogni sikla eba siklini hinjaknairogno kisa judakhe lam selaijakuk. Jora kaisao Tripura ni Tiprasa tongnairog poriwi sebuk naharnano simino khakalaijak. Phiya tabuk swlaimungo nongkhorlaijak juda juda bwkhaktwino Tiprasarog. Mol swlaijakmabai baksa baksa joto tongkhor tei sikla chalairogni wansukmungbo tabukni oh molo belai mokol kaichom thothok.
Agartala ni simi 61.2 km hakchal bwkhak thanglai wanw. Dinesh Jamatia ni nikuma wngkha Gomati hangkhorni bisingo khobjak 30 No.Bagma Killa ni Kami kwtal. Kok wngkha hai jora wngkha Covid o. o mol hayung ha kotor lukurogni bagwi belai wanamasinsa tei kirimasinsa. khoroksa Killa amchai Kami kwtal ni Dinesh Jamatia. Kok bokhorog hinkhe abohai Samungni bagwi Bengaluru thangwi sogwijak tei samungbo khwlaiwino tongmani. Ah jora Dinesh nukhung belai rang-puisani jwngjalo tongmani aboni bagwi ang wansukha haino nogo achugwi ereng ereng tongwi chukliya kaisaya kaisale samungo kwrwngna nangsinai. Abohairog wansukgwino Bengaluru ni songsa Hotel cum Restaurant samung khwlaimani. Bisi nwi hai o restaurant o tongkha tei nukhung hukungrogo suda rang puisa rohor tongjamani sakha Dinesh Jamatia. Phiya Covid-19(CORONA VIRUS) hayung ha kotormao pirjakmahaino Bengalurubo pirjakha. Arono achaio langmani teibo dosa kotor Dinesh ni. Bini nukhugni bororokbo wanlaijak abohai joraono chubachu khwlaiwi nogo kiphilwi tubukha. nukhungni borokno karwibo kami amchaini lukurog ano belai chubachu khwlaikha.
Lockdown eba corona virus ni jora nogo phaiwibo belai wanajak tei bangaluru tongphuru rang ajimanibo sana thangkhe nogo kiphilphuruno joto paiwi paijak. Aboni ulo nukhungni bororokno teisa hainohai rang rwui khungsa chamung phalnok swnamkha Mahanta bazaar, Noabari Killao. Puila phalnok songsaphuru lukurog aswk bangthaya tei manwi phalna hwnwi tubumarog aswk phalwi manthaya. Ulo nokha salnwi saltham tongte tongte lukurog ani phalnok ni chamung chawi sai manbaikha belai kothok hwnwi. Dinesh sakha aboni ulokhe ang tei uklogo naisikna nangliya tabuksa jora. Salo wngya hinphano khok chisai ni swlaibo kwbang phalnwi mano. tei khaksa bwkhak ani phalnokni mung Kulokya. Aboni bagwi tabuk Kulokya phalnok buphuru phiyokno hwnwi painairog swkang phaiwi achugwi tonglaio ani phalnok gana. Aboni bagwi ang sak baithangbo belai khatungo. Abono karwibo ang khoroksa phalnokni nokphang wngwi ani o phalnogo tabuk khoroknwi Tiprasa siklarogono samungo thepawi tongo tei samung akorogbo phwrwngwi tongo. Ulo borogbo thinango abohai samung rogo chuknai tei borogni bisingtwibo khoroknwi khoroktham nukhung hukung choliwibo manai. Angbo abohaino naio. Tei ALM Website naiwi tongnai sikla siklirog jeswk porijakphano wngthun abohai samungrogbo sikuk khe teibo chao. Abohai samungrog nwng porijakphano nini sakle chikonle wngwi thangya. Aboni bagwi joto haino achugwi sal lairwnai tei manwi hamya chanairogno ang koinani muchungo abohai samungrog tomung khwlainani muchungkhe chengwisi mankha tinini simi. Bwskangni salo nwng sak baithangbo hamchadi tei buinobo langma kwtal songsawi rwdi.
Langmao tabuk khoroksa kaijak Dinesh Jamatia ni nukhungo tabuk jotoui khorokdok tongo. Kwbangkuk khwlaiwi sana thangkhe o phalnokni bisingtwino kaham khwlaiwi choliwi tongjao Dinesh Jamatia ni nukhung. Bwskangni salo ang wansuk tongo chini Tiprasarogni rangthongno krak khwlaina bagwi chamung bahaikhe swnamna nang aborogno phwrwngnai. Tomung nwngbo muchungkhe swrwngwi mano. paithago sanani muchungo aboni bisingtwibo chini Tiprasa ni kisale hamkwrai phaio.
"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"
コメント