Lama bai nangjak kaham lama thaibai kwrwngwi Buphang phangsa susu wngui tongjama sakkaisa wngui achai Naithok wngui tongphuru manthokya thaio manwi rwkha bithi nangmani buphang tei ah buphang ni mung hinjakgo 'Letok'. Kami amchaini borokrog sinimano obo bithi nangma hinui tei tamo wngthani samungo phwnangjak tei bini yarwng bwlai bwthai' aborogno jotono khopbwino saimanlainai.
Palia Banga amchaini Gulsadhu Kami ni thaio tongjanai ani thagu bo wngkha bithi bwrai bai luku no naijao tei mungsa susuno khop yawi je mansak bini saimanjamatwi luku hamkwraini bagui swrangjao bo saimano chini hakungo manthokmani tei sakkaisa achaiphaijak rogni bithi nangma akrogono bo sajao, Letok ni bithi nangma tongo tei Letok chini hasteo dal kainwi tongo kaisa wngkha Letok kwchakjat tei kaisa hinkhe Letok kwkhrang. Bithi nangmani buphang hinui chwng saimano kwthang borokni bagui kwthang tongwi tongnai borokrog samung tangthani dokhorog mankhe taking rog ruwai jakha khe Letok bwlai no hor ganakhe mothongwi sinno hinkhe ruwaimarog tei sama rog kisa helengo hinjakgo.Tabok bini yarwngbo bithio nango bini yarwngbo hinkhe je borok bukpar lokhlai jago tei himwi Maya bohok sajakma khep khep hinkhake chwng o yarwngbo totra kanrwi rio haikhe bukpar lokhlaijakmarog hamo. Tei bwchlwi kwra rwna phuru bo chwng bwchlwi no narakgo tei bwchwlwi bo magnang khibina nangya bo yokgui chao tei bini thokbo swnamwi moi songui chaimano.
Chini borokni bagui sakropmarogno hamrwna bagui Letok kaisa susuda bithi wngna?
Banamali Debbarma ani thago saphiru, sakni dukhu manna ni bagui bithi nangma tongo kwbangma dalbidalno abo kaisa kaisa ni mung juda juda khe sinijakgo aroni bisingo kaisa tongo 'Letok buphang' haini bagui Letok ni nangma bo bini bwlai bithi nango tei bithio nango yarwngbo.
Tabok Letok rog joto thaioda manthok?
Chini kami Gulsadhu para o manthoklia tei nuklia tei naitokgui bo naijaklia tangui hinkhe chwng chini borokrogni bagui sak hamrwna hinkhe phatsa hamrwi manai aro Hospital o Dr. naijakna ma khachikgo aboni baguino omohai bithi nangmarogno bo chwng jotono khel khailia wngui thangkha tei chwngbo joto bithi nangmarogno bo naitokphano manthoklia hinui mungsu najaklia.Tei chini jora rogo le Hospital bo krwi tonguibo hachal phiya tabok chwng umor ragbaikha tabokle Dr. thana kwlai wngkha garirogbo manthokbaikha aboni bagui sakhamrwna bagui jesaohano wngkhe Molom kaisa paina wnguibo kulum bithi mungsa paina wnguibo bohok derajakgui bo dokan ni bithi abono naharwi chawi hamlai tongo.
Chikon chikon deramungrogni bagui bo khel khwlaimano tei aboni bagui chini hakungo manthokmani bithi 'Letok' aborog belaino samung nangmao khopjago.Chwng twrwk twrwk komorna thang tongnai bithi bwrairogno rutukgui phunukgo tei chini chuchu thago song simino khakawi swngthani saimanmung mano.Teibo tongnai chini komorna naitongjak aborogno naitokgui kariwi tei bini bithi nangmarogno saimnna manai angbai swijak article ni bisingtwi kwrwngwi tongdi chini adivasi lives matter bai khwlai.
"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"
Comments