Tripura hasteni Tiprasarogni kwbangma Hukumu mukumu o kuti bisini swkang romwino kaisa kok poito chajakma tongo. Aah poitorog wngkha kaisa kirima sincha eba hamya Chaya wngui tongmarogno boini hamya khwlaijakgo hinui kubui poito chajakma.Borokrogni bisingo wngui tongma nukgui tongmabaino poito bo chajakgo hinui saimano. Pori kolopbo,swkal mwtai hamya kolopbo tei kobor khwlaijakgo tei bohokgo moi swkjakgo aborog wngui tongma nukguino lukuni thani poito chajakmabai hamrwnai eba hamya no hamrwimanai hinui borokbo achai phaima tongo.Aah borok ni kubui kwthang kokthai bai saimana bagui chwng tini chaitoklainai.
Bimal Debbarma bo sao 'Tantrik' hinui phiya abohai samung khwlainarogno tamo hinjak kokborok kokbai chini Tiprasarogni thani amjokmung tabok phano nukjakyakho tei angkhe sanai English bai 'Tripuri Spiritual master' hinui tei Hindi bai bono 'Adhyatmik Gyan prapt' hinui mung rwkha.
Bimal Debbarma ni kokthai, ang chwrai khasiphuru ni siming nukgui phaikha Ani Babu borokrogno Ayurvedic bithi rwwi Kulum kwsa hamrwmani.Tei lukurogni bagui Ani babuno puila Kabiraj hinui sinimung manmani.Bo phwrwng kwlangmabai angbo lukurogni bagui kaham samung khwlaikha abo wngkha je manmani eba manthokmani bithi naitokgui naharmani bisingtwi hamrwi phunukha tei aphuru Simi angbo wansokgui nakha o samungno nu ani langmao kaham samung phwnangsinai hinui.
Tantrik hinui le tamkhe sinimung mankha?
Bimal, Tantrik mung rwjakma tei Tantrik khwlaima aboni bo kaisa swrwngma tongo. Puilao ani babu song rog ni jorao nok gana gini bolongrokgo nu yapai kisisa himui thangma baini bithi bwrai manwi phayo tei haini bagui amswk kebengmung krwi. Phiya jora laite laite bithi manthokya wngrwkgui phaikha haini bagui abono Ang khwlaima muchung phano khwlaisok manlia,sana thangkhe lukurogni bithini mung sawi rohor wo aswkno.Tabok Tantrik hinui sinijakma tei kabiraj khaio hinuibo sinimung manmao ani Babu bai manma abo hinkhe Tantrik hinui hinjakya. Ang 1966 o forest department o chakri mankha tei aphuru Ani kaijakma bo bisi tei Ani umor aphuru 21,22,23 mohairog.
Tantrikni swrwngmung saboni thani mankha tei abo khwlai bwswk kaham hamya nukjakha?
Sri Bimal, puila ani babuni thani kaisa kaham swrwngmung mankha phiya abo hinkhe Tantrik hinui sinijakya abo khe bithi bwrai rwmani.Tabok Tantrik srwngmani amo ang atharo mura posting phuru khoroksa sanyasi ni thani bini kokrog khwnawi swrwngna muchungmani.Phiya ah sanyasi sao je oh samungno swrwngna hinkhe ani chakri ma yakarnai hinui.Kwbang jora nawi wansokgui ang 1971 o chakri yakarwi rwkha tei oh samungno swrwngna bagui yapri sekha tei tabok phano Ani oh samung ni bahai hachal hachal thai phasingni lukurogni bagui bo manhorwi tongo.Ani thanio Sabroom,Ambasa tei kulai, ayang amswk hachalni borokrog bo phaio.
Kwbang bomhairogno nai tei oh samungno swrwngna bagui tei tam no naijak?
Sri Bimal, chwrai bwsarog thophuru achomsa kabmani amorogno swtwi pora rio,tei nokrog mudra khao,bohok sajakma amorogno chakhwinpora rio,tei kobor rog hamrwkha,tei burasa koboljakmani,phola koboljakmani amohairogno kwbang hamrwkha hinui mano eba naijakgo.Tabok kaisa nangkukmani kok bo sao Ani Guru oh samungno swrwngna hinkhe kubui tei tatal saya kaham borok wngna nangnai hinui tei kaisa paithak kok ani Guru ni swrwngmungo borokrogni bagui kaham naithani tok,pun,takhum ratharwi maya abohai,haini baguino bo sao kubui wngna nangnai hinui.
Adivasi hinui sinijaknarog eba bolong gana nok ta gui tongnai chini Borokrogni agi jora kwbangma swkangni simino omohaikhe kulum kwsa hamrwi phaima nukjago.Phiya tabok 21st century o omoswkbo borokrogni bangui puito chawi Maya wngphano,puito chanai borok tabokbo tongkho tei omohaikhe hamwi nukjakmabaino chini borokrogni bisingo kubui puito chajakmabo.
"O kokbwkhal swnamjakha Adivasi Awaaz projectni bwkhaktwi, MisereorteiPrayogSamaj Sevi mothani chubamungbai."
Comments