Nandi Gopal Jamatia ungkha khoroksa Gomati Hankhorni Amarpur bwkhasteni Burburia Kamini. Omo wngkha boni sinimwng achaima tei tongma thai. Boni samung khaimani hikhe CT(Contract Teacher) tei boni chwrai khoroknwi tongo omohai khe borokni nukhungo khorokbrwi khlaiwi tonglaijao. Chini Tripura haste o boni khorang kwtwino kebo khwnaya kwrwi tei bo Tripuri 19th tribes ni bisingo khoroksa rwchapmwng kwrwng tei athukwrwi hai khlaiwi dophani hamajakmwng bo manwi tongo. Haiphano kwbangkuk luku no saimanya boni nikuma, thai, bo bahaikhe tong chabo bahai khebw yaphangni Simi rwchapmwngni hapharo gwdalkha tei ranchak (gold ) medal rokbo jitiwi mankha.Tei boni ungklogo swba Bono chubakha phai di lukurog boni laibumano saimanlaiwanw o kok bwtang porelaimani bisingtwi.
Nandi Gopal Jamatia bai koklam salaimani bisingtwi bo pwila rwchapmwng ni hapharo yapri semani hikhe 1995 bisi ni Simi hwnwi sakha. Bo hikhe omotahai khoroksa chwraiphang Simino rwchapmwngno belai khe hamjago. Abohaikhe bo Harmonium tamjaknairog twrwk twrwk swrwngnani chengka. Aboni yagulo Nandi Gopal Jamatia Guru romnani chengkha ah guru hikhe tabok o swngsarno yakarlangkha Abhi Kumar Jamatia bonw pwila rwchapmwngni hapharo bono lama phunuknai hwnwi sakha. Aboni yagulo teibo Bono chubanai rokni mwng khursakha takhuk Lakhon joy Jamatia,thakhuk Sankar Jamatia tei bwta okra takhuk Sayan kumar Jamatia tei boni lagesong (wife) Biba Rani Jamatia borogni yak kwrwi hikhe bo aswkjora sogwimanya hwnwi sakha.Tei oro sathai kwlaio o swngsarno yakai thangjakha Abhi kumar Jamatia ni kokno.Bo hikhe khoroksa Jamatia community ni bisingo rwchapmwng musuimwng ni langmao belai swkang tei swithanio bo haino. Abono karwibo hai no Jamatia community je sirisitini rwchapjagwi phaimani jadu kolija rwchapmwng rogno rwchabwi mano hwnwi sakha. Nandi Gopal Jamatia.Tei boni bisingtwi nw kokborok modern song eba rwchapmwngrog twrwk twrwk kuchuk kawi phaikha hwnwi sakha. Kwbangkuk lukuno sawi manya Jamatia community ni jadu kolija rwchapmwng tongwde kwrwide.Tabok chwng saimankha Jamatia community borokrognibo Jadu kolija tongo hwnwi.
Nandi Gopal Jamatia bo pwila lukubai hamjakma mannani sinijakmani hikhe 1997 bisi o Agartala Akashvani Radio center bai kwrwngphuru.Aphuruni simi bobai rwchapjak khorang kwtwi Tripura haani lukurogni thani bwkhao buhoro.Ah rwchapmwng ni kokthai hikhe "Bolongni khumno mala submani swbano kanrosinai". Abohai khe bo lukubai sinijaknani chegkha.Boni sakbai swijak tai kubuni swijak rwchapmwngnobo rwchabo hwnwi sakha.Radio centero rwchapjakmani hikhe Sara eba 100 (One Hundred) ni saiphano kwbang rwchapmwng rwchapjakha hwnwi sakha. abo haikhe bo teibo lukuni hamjakmwng manmabai jaga jaga programo kobokjagwi khorang ronani chengwi phaikha. 2003 Bisi Khumulwng ADC o All India Radio center bai kobokjak tei sponsor khaijak aro o bo Tripura ni jottoni wngwi champion eba kwplai wngkha hwnwi sakhlaijakha.Aswk bai thakyakho 2008 Bisi o ত্রিপুরা ফোক একাডেমী eba Tripura Folk Academy bai kobokjak tei sponsor khaijak স্বর্ণ কণ্ঠ eba Swarna Kontho (Golden voice) hwnwi arobo Jotto Tripura hasteni wngwi champion eba kwplai wngkha hwnwi sakhlai jakha tei aboni loge Gold medal sokat bo Nandi Gopal Jamatia ni yago yapharwi rojakha. Abono karwibo bo kwbangma NGO ni thani sokat manmanibo tongo.Tei kubun hasterogo bw, shillong, Nagaland, kubun Haa Bangladesh rogo bw mathangkha.Tei boni ni rwchapmwngrog wngkha Thamra eba 300(three hundred) ni saiphano kwbang swijakha tei rwchapjakha hwnwi sakha.Bobai rwchapjak dal bidal tongo, romantic song, patriotic song, Gospel Song, Haa no lobwi rwchapmarog abohaikhe bobai kwbangmanw Rwchapjakha. Omohai dalbidal rwchapmwng kwbangmani bisingo bo rwchapnani hamjakukmani khe gajal rwchapmwngno hamjakugw hwnwi bo sakha.
Kubun Article: Bahaikhe swnamwi man waruk tei rai bai kanjaknai manwi
Paithago Nandi Gopal Jamatia kobokmwng narwkha Tripura hasteni modern song rwchabwi tongnai tei sikla sikli ni thani o.Rwchapmwng abo Entertainment tei jottono rwchapmwng hamjak bai o haiphanw dophano lobwi rwchapmani,luku hodani hamkrai ni bagwi rwchapmani awareness no twiwi rwchapmani twmani hikhe tabok Tiprasa dophani jotto Kami Kami amchai o no drugs bai koboljak aboni bagwi rwchapmwng ni bisingtwi lama hamya himwi tongnairogno rwchapmwngni khorang khwnamani bisingtwi lama kaham tongmwng kahamo kha kiphilwi mano hwnwi kok kwcharkha Tripura hasteni Sikla-sikli rogno.Teibo sakha je rwchapmwngo kha gwnangrogno swrwngna muchugwi tongnairogbo phwrwngnai hwnwi bo sakha je bo mansak.
Comments