Haste-ni Tiprasa dophani kok tei Tiprasa dophani hukumu-mukumu-ni laibuma sanani thangkhe Borom Gwnang Biswadeb Kalai-ni mungno khursayaui tongwi manya. Bini achaima thai wngkha Sipahijala hangkorni Jampui bwkhasteni Darkai Kalai kamio. Cheraini simi-no Tiprasa hukumu-no hamjaknai khoroksa. Bini Buma-Bupha-bo belaino tamung rwchapmung-bai kwrwngwi tongnai nukhung. Tiprasa dophani Rwchapmung, mwsamung, koklob, koktang, mwnwi kothok, tokey -thwngnwk haphar-ni kokno sanani thangkhebo BG.Biswadeb Kalai-ni mungno achuk khampwlai rwthai. Bini sakbaithang swijak kwbangma rwchapmung, Koklob,Koktang khwnaui bwswkse mankha lukurok khao khakchangma tongthokma. Jora hamya biyal tekto wngwi tongphuru-bo Kokborok Tokey Emang-ni Da Chimlang-ni kokno muito mankhe uanama poja helengwi thangjago lukurok. Borok khoroksani langmao mwnwimung yakhe khakchangma tubunani haino ereng ereng kokya. Nangnai Mwtai-ni rohorjak elem kwrwng. Abohaino khoroksa Tiprasa dophani elem kwrwng sajwla Bg. Biswadeb Kalai.
Thangnai 1978 bisini simi amchaini Jampui, Thelakung, Ampi, Killa-rogo Dol Jatra-rogo Jatra mwsaui puila hukumu haphar-o yapri beramani . Bo wngkha nukhungo jotoni swlai kusu .Bwta-rokni uklok uklok thangwi aro-uro Jatra mwsaui khoksa khoknwi rang ajiui hukumu haphar-o yapri rwna chengmani Tiprasa dophani multi talented Bg. Biswadeb Kalai. Aboni ulo twrwk twrwk Kokborok Tokey haphar-o yapri rwkha Kokborok Tele Film Khumpui-ni bisingtwi. Kaichi chuku Tiprasa bosong-bai kwrwngjak Raima Saima-no rwksaui swnamjak Khumpui Tele Film . Kaisa-ni ulo tei kaisa khe kaichidok-swk Tokey khwlaikha bo. Aboni bisingo bini chajaksukma tokey wngkha Emang . Kokborok Emang tokey-no belaikhe luku hamjakmung manwi tabuk Emang 3 khwlaijagwi tongo . Daktino abo lukurokni bagwi phiyogwi rwjaganw. Abono karwi-bo Busulung Tokey khwlaijagwi tongo hwnwi Bg. Biswadeb Kalai-bai koklam salaimungo saui mankha.
Kubun Article: Sirisitini kerang kothoma bai kwrwngjak Tripura hani twikhor
Sakbaithang bachaui simi achuk tongliya dopha hamkwrai-ni samungbo tangwi tongo BG. Biswadeb Kalai. Tiprasa dophani piring poroi chapna bagwi tei sakni rwngma sima-no phwrwngna bagwi Garia Hukumu Social Welfare hwnwi kaisa NGO songsamani bo. o NGO songsamani naharmung wngkha Tiprasa dophani kaichi chuku bosongni kwmajak hukumu mukumu-no kwthang khwlaiwi narwkna. Lama hamyao himjak Sikla sikli-rok hukumu-mukumu, thwngmungni bisingtwi borogni bwkhano swlaina tei amchaio tongkwchang romwi narwkna. Rang khoksa nayaui-no Tiprasa dophani sikla-sikli-rokno phwrwngjagwi tongo dophani hukumu-mukumu-no twiwi . Sarinda, Sumui,rwchapmung akorok phwrwngjagwi tongo Garia Hukumu Social Welfare-ni bisingtwi . Je dophani hukumu-mukumu kwmajak a dopha wngnai piring poroi. Aboni bagwino nangnai yak baksa yapri thansa khe chubalaimung.
Tabukni kwtal achaisong-rokno kok kwcharkha sicharwmung-bai kwrwngjakno twiwi tokey khwlainani. Sicharwmung-bai kwrwngjak kothoma-rokno twiwi Tokey khwlaikhe belaino kaham wngnai hwnwi kok kwcharkha BG. Biswadeb Kalai . Dopha chapthani Bg. Biswadeb Kalai-ni yapri rwma dophani hukumu mukumu-no kuchugo twlangnai abohaino lukurokni uansuklaimung. Dopha chapthani tei dophani hukumu mukumu-no kwthang khe tonina bagwi Bg. Biswa Deb Kalai simiya nini ani hwnyaui joto sijak nukjakno bwskango phainai. Abohai wngkheno dophani mari hayungo manai kuchuk thaio achuk khampwlai.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.
תגובות