Songsamani sal 20th September 2020. A jora hayung ha kotor gwnangwi Corona Virus bemuk pirsajagwi tongmani. Khaksa bwkhak rang puisa ni belai chasamung kwrwibo tongmani joto tongkosong lukurogni yago. Tei khaksa bwkhak Music Industry tongnairogni yagobo rang rini belai jwngjal kuplwng tongmani. Abohai joraono India ha kotoni bisingo khobjak North East Tripura hasteni Boyar Debbarma tei Gobin Debbarma kok salaikha Tripura ni kwbangma rwchapmungno kaisa krak mwthangmung haiyakheba Copyright khwlainani tei ajimung rwnani twngsa lama swnamwi rwlainani hwnwi. Kok thaisabai sana thangkhe Audio Streaming Platform khwlainani Tripura hasteo. India ni bisingo khobjak haste Tripurao bisi kwdwkma romwino rwchapmung hapharbai gwdaljak tongmani. Tripura o bugra molni simino rwchapmung mwsamungbai gwdaljak hwnwi sawi mano. Khursathaibo kwlaio Sachin Dev Burman khoroksa Indian Music Director tei Singer. Abono karwibo bo khoroksa bubagra nukhungni borok. Kok thaisabai sana thangkhe Tripura ni rwchapmung haphar belai kotorkuk phiya officially mwnakjak tongmani jora kaisao.
Phaidi hinkhe tinini kok bothoma ni bwkhak mokol naikochomwi naiwi nailaianw Tripura ni Music Industry o samung khwlainairog belai kha kuwar khwlaiwi yapri selaiwi tongo. Phiya rwchapmungno twiwi copyrights bahaikhe khwlai aborogno kahamkhe sawi manlaiyakhu. Abo bahaikhe khwlaibo kahamkhe silaina naiya music industry o tongnai baksa baksa samung khwlainairog. Tei khaksa bwkhak o jora baksa baksa Tripura ni kotor kotor Production House akorog twrwk twrwk Audio Streaming Platforms kwrwngmanibo nukjagwi tongo. Tripura Shri Boyar Music Audio Streaming Platform jephurumi simi phiyokjakha aphuruni simino kaisa naharmung tongmani abo wngkha Tripura Producer eba Music Industry o tongnairogno mwthangnani. Bahaikhe? Tangwile Tripura ni Production House eba Producer tongnairog Youtube Platform simino naharwi tongnaiba chwng naio Audio Streaming ni bisingtwi Royalty mana wngthun Tripura Music Industry tongnairog ayang bwkhak naisigwino o yapri hwnwi sakha Shri Boyar Music ni Founder Boyar Debbarma.
Tripura Music Director Milton Debbarma agreement khaimani
Tabuksak jora chini Music Company o Tripura ni kwbangkuk Sub Labelno kwrwngkha . tei baksaba sak baithang eba Individual Artistsbo kwrwngkha. Aborogni bisingo tongo jotowi Tripura ni kai nwichi Music Production tei kerela hasteni kaisa kwrwngjak tongo. Chini company talbrum production o kwrwngjakrogno royalty rohorwibo tongo. Teibo nangkukjak wngkha tabuk Kokborok rwchapmung eba Tripura jesa kokbai rwchapjak rwchapmungrogbo copyrights khwlaiwi manmabai baksa baksaba imanghai wngjaklaio. Baksa abono kaham hwnwi tabukbo wansukya.
Tripura ni baksa baksa sijak nukjakrog eba o audio Streaming Platform no sawi manjak haino ereng achugwi tongna naiya. Buini kolomtwi khikwlaiwi samung khwlaimani rwchapmung eba Video no muchungwi upload khwlaiwi rangbo ajiwi tongo. 19th century ni simi 20th century jora abono twiwi mungsa silaiya tongmani Tripura ni kokborok Music Industry. Kusung kusung bisi romwi muktwrwi lailaijak. Aborogno kasuna bagwino o Company phiyokjakmani Tripura hasteo. Baksa producer eba o lama no saimanjakrog juda lamatwi samung khwlaimani nukjakgwi tongo. Aborog wngkha tomung nwng nokphang jotonino haiphano bui baksa sijakrog nini rwchapmungno audio streaming platform o swkang upload khwlaiwi paio. Aboni ulono jwngjal kuplwng achaina chengo. Phiya abohai samungrognobo jotono chini company swrai swrai nokphang hwnwi kaisa sinimung tubuwi kaham lamao kiphilwi tubuwi phaikha hamya lama himnairognobo hwnwi sawi khwna rwkha Shri Boyar Music ni Co-Founder Gobin Debbarma.
Chini companybai kwrwngwi tabuksak jora kahamno bwthai manwi tongo. Romdi tabuk Tripura ni Top Rwchap kwrwngrog Thwiwi thangjak Bimal Debbarma, Bipasha Reang, Parmita Reang, Swkang Debbarma, Arun Debbarma, Biswanath Debbarma, Jayanta Jamatia akosongni rwchapmung audio platforms upload khwlaiwi talbrum rang manwi khatungmani kokrogbo sawi khwnarwkha. Bwskangni salo Music Industry ni imang kubui wngthun tei hamchawi phaithun abono naharmung Shri Boyar Music ni.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.
Kommentare