Bharat Hakotorni chikon kaisa haste Tripura hinwi jotonw sawi manu. O Tripura hasteo kwbangma Laibuma thai tei laibuma rwksajak kokthoma bw chwng khunawi manu. Hayungw Tripura nw 2nd bubagra rok raj khai thanglang mani ha hinwi sinimwng manwi tongw. Ora tongw kwbangma Hani bwsa (Indigenous) tei juda juda Sakni kok sanai bosang. Phiya kwbangma Sikla tei Sikli swrwngmwng paima yakulo phanu lama thakjak thangw - Chakri manya ungwi sakni langma mwnak jagwi thangbaio, O samwng nw barja nawi mwnak ni thaino pohor ronani samwng tangwi tongw Tripura hasteni khoroksa lukurogni bangwi Bubhuti Debbarma mungwi. Bw o samwng nw yachakna 28 bisi romwi kwrwngkha NGO bai, boni swrwng mwngni jorani siminw.
Bibhuti Debbarma ni tongthai nok ungkha Tripura hasteni Rajakhar Aguli o. Bw khoroksa haphangni sevak phiya bw sakni hasteni Sikla rokni jwngjal nw nwgwi o samwng nw kaham khe barja naharwi samwng tangwi tongw. Bw Class 10 pore phroni siminw bw NGO rogni samwngw kwrwng kha. Bw kwbangma hayungni lukui rokbai tongte tongte nw swrwngmwng manwi boni sakni kaisa motha swnam kha “Youth for Integration Trust” hinwi, O motha nw Bibhuti bw 2010 bisi o haphangni thani registration khaiwi nahar kha. Borogni o motha Sikla tei Sikli rok nw yak samwng simiya kwbangma Tripura hasteni luku rok nw borogni chukya jora rok thangwi nai chamung nungmwng bagwi kha, tei kwchangma jorao ri kutung rok. Bibhuti Debbarma sakha bw 16 bisini simi o kheno boni langma no puila luku rokni bangwi samwng tangmani yapri sep jakha. Bw kaisa Manipuri hasteni pandao manjak mani yakulo kheno luku rogni bangwi samwng tangna yak sotonjakha. Aboni yakulo “Youth for Intergration” Trust sungsa laikha borok, borog bai kwbangma luku roknw kwrwngwi tongw. Borog Tripura hasteo simi kwbun hasteo bw chubawi phaijak “National Intergration” bai bw borog samwng tangwi tongw. Aghio Assam hasteo Bodo tei Muslim ni bisingw chuba ungphro tong kwchang tongna bangwi bw borog ora thangwi nai panda khaiwi laijakha. Tei machaya manung ya ungwi tongnai roknw chamung bw bagwi tongw borognio motha. Omo haikhe nw aghini jorao Tripura hasteo bw jora tungphla mwng tongphro bw omo haikhe nw luku rokni bangwi tongkwchang haya kheba peace camp khaiwi tongw hinwi sakha Bibhuti Debbarma. Peace Camp Tripura hasteo borog kaitham thaio khwlai laikha Sabroom ni kalachharo waisa Manu bazar o waisa tei Agartala o waisa khwlai laikha. Ora Bharat hakotorni kwbangma hasten nw kwrwng phaikha 300jan tei 16 haiyakhe 17 hasteni luku rok.
Tongkwchang tongmwngni bisingw nw boroknw motha nw tei kaisa samwngw nokharwi rophikha Tripura Sikla tei Sikli haiya khe luku rok bahai khe sak saichung bachawi Dophao sinimwng rowi manu hinwi. Aboni yakulo kheno “Community based” samwng khaina chengkha borok tei luku rok bw borokni samwngnw yachakna chengkha - Agriculture, Eco - Tourism tei Entrepreneurship development omo thai rogo samwng phunang manwi tongw kisa misa sikla roknw. “Youth for Intergration” bai kwrwngjak bebak hankhor (District) nw kaisa unit swnam jak tongw, bebagwi 17ta unit tongw. Phiya thangnai 4 bisio kwbangma samwng tangnai rok nw Political bai kwrwngwi thangma bai kisa borok komema nwk jakha. Phiya tabok phanu kwbangma amchaio active khe samwng tangwi tongnai tongkhw hinwi sakha Bibhuti, Bw sakha Jampuihill, Kanchanpur tei Ambasa amchaini luku rokbw kwrwngjak tongw hinwi. Borogni mothani “main focusing area” Takarjala tei Hejamara rogo borogni samwng tangnai kwbangkwk nwk jagwi tongw.
Bibhuti tei bw sakha borok o Trust Decentralision khe samwng tangwi tongw. Aghio je samwng tangwi thangnai rok borog kwbangma thai samwng khaiwi tongw tei borok tabok phanu chubana bangwi jorao chubamwng rowi tongbaio. Tabok o Trust kwtal kwtal borok tei bw kwrwngwi tongw sakha Bibhuti. Kebengmwng tabok swk jora swk waisa phanu kwlaiya khw borogni Trust. Borogni o Trust Non-Government tei Non-Religious tei Non-Political khe samwng khaiwi tongw. Haiphanu je borok o mothani samwngni phatar thangphro hinkhe je janija mwchwk manu samwng tangwi tongbaio. Haphangni bwkhaktwi bw tabok joratwi mwngsa kebengmwng phaiya khw. Aghini Haphang tongphro bw samwng tangwi tongw tabokni haphang tongphro borog samwng tangwi tongw.
Adivasi lives matter mwngwi kaisa motha tabok Tripura hasten content Creator rok nw belai ajimwng bwkhaktwi chubamwng rowi tongw. Tripura hasteo o mothani nw tobo thanio bw “Youth for Intergration” tei Bibhuti Debbarma nw yak tongw hinwi salaio lukun rok. Abonw karwi bw Corona ni jwngjal akarma jorao luku rogni jwngjalni jorao chubalaikha Tripurani bebak hankhoro thangwi - Youth for Intergration tei Adivasi lives matter tei Pragya Samaj Sevi sanstha ni bisingtwi bebak hankhoro thangwi 1600 luku rok nw chubamwng bangwi kha Kami kami thangwi. Chamung nungmwng dail tei mairung tei Mask rok bagwi laiwi kha borok tei kwchangma jora ri kutung rok. Phiya Tribal amchaio samwng khainani kisa kesep - tamoni hinkhe belainw Awareness kwrwi ni bangwi - mwngsa swk samwng khwlaina thangkhe nw Awareness kwrwini bangwi hamya wanswkgwi thangw. Tangwi hinkhe aghio kwbangma scheme nw kami kami tangwi rang kwbangma aji mwng mannai hinwi phunugwi rang tulangwi thangja baima bai krijak luku rok. Phiya waisa sawi man thang kheno borogno yak phloksa rohor baio luku rok - Bibhuti sungni Trust sao chwng ora mwng ronabw phaiya nanabw phaiya chwng nirok nw kaham awaimwng ronasi phaio hinwi. Borogni motha tabok rwng swrwngnai rokni bangwi kaisa achokthai bench bw bakna thangwi tongw Damchhara PHC ni 3ta School o tei Assam hasteo bw.
Bibhuti Debbarma Tripura Haste Hani bwsa/Tiprasa rogni jwngjal rogni koknw bw kisa khwrsawi sakha- Tabok ni chwrai rok short cut lama nw mangnw naharo - jepha manwi nw shortcut bai mangnw manna mwchwk jagw. Tei tabok luku hamkhrai ni bangwi samwng tangnai manthok liya - Awareness kwrwi bangwi kwbangma political bai kwrwngwi thangma bai hakchak ni bangwi Dopha hamkhraini phaisingw jwngjal ungwi manu. Ang o samwng nw khaka hinkhe joto ani kami amchaini luku rok nw manwi manu hinwi kaisa samwngw phanu hinwi samwng tangnai manthok ya ungwi thangw.
Bibhuti bw khoroksa Haphangni sevek - bwi bai kebang jagw - nwng bahai khe haphangni borok ungwi nai omo hai samwng bai kwrwngwi man hinwi. Bw sakha Haphangni sevek phanu tabokni jorao Digitalni bisingtwi tei Volunteer roknw sawi rokhe nw borognw samwng tangbaio. Tei bw sakha bwchungkhe lama phunuknai sei samwng tangnai hinkhe mothani Volunteer rokse. Teibw khuk kengkha Haphangni sevek rokni thani nw omo hai kwbangma scheme rokni koktwma sophaio - tei omo koktwma rok luku rogni ora sogwi ungwi thangw, omo hai jora rognw haphang ni sevak ungwi tei bw samwng chasawi phaio. Phainai jorao teibw luku rokni bangwi tei dopha hamkhrai bangwi samwng tangwi tongw borogni o motha.
Comments