Kuchuk beremo sokat manwi bahai ma tong?
Bwkha belai tongthokjak haiphano angbo saimanya aswk ang sak baithang buchiwi manliya puila khwnaphuru. Tangwi hinkhe ang kaisa Bharat ha kotorni kaisa kotorkuk sokat manai hwnwi aboto belai wanama sinsa kokno. Tamo hinmale angbo aswk rwchap phaimani yagolo kwbangmano sokat mankha, haiphano Bhatar ha kotoro aswkhe ano saijakha hwnwi ang wansukgwi sakbaithang mokolni muktwibo phaikha aphuru. Haiphano ang imanghaisi ma tongo. Hinkhe aboni salsa salnwini ulo teisa ano kokdukbai kwrwngkha Sangeet Natak Akademi ni wngwi kha kaham yapharkha. Award mana swkang kokdukbai kwrwngphuruno, ang wansugo abo angno hwnwi. Ulo ani emailbo PDF file sokphaikha aphuruno teibo poito chao ang. Email phiyogwi naimani ulo aro mention khwlaijak tongo kubuni hasterogni sokat manairogni koktwma. Aborog wngkha Andra Pradesh, Madhya Pradesh, Gujrat, teibo kwbangma thairog. Teibo ani bagwi nangukukjak wngkha Tripura hasteni koktwma bwlaih tei koktwma habanokrogoni bisingtwi auaimung khwlaijak nukha.
Tripura hasteni Hukumu-mukumuno twiwi tamo tamo perform khwlaijakuk?
Angto kwbangmano perform khaikha abono karwibo phatar hasterogo kwbangma panda akorog khwlaikha. Like Tripura hasteni kwchamkuk Jadu Kolija, Lebang, Mamita, Mosok Sulmani, waying khilimanirog akorog rwchabo.
Tripura ni phatar hasterogo boro boro thangwi bolaimung mankukkha?
Bolaimung kwbangma thairogono mankha. Delhi, Uttar Pradesh, Rajeshthan, kuch Bihar akorogo. Aro thangwi rwchaphuru ano belaikheno borog hamjakha. Tei abono karwi tei kaisa kok ang muito wngkha tabuk ang jephuru Kuch Bihar o thango aphuru saltham ni bagwi panda wngo ah thaio thangwi ang puilani salobo rwchapkha tei paithakni salobo rwchapkha Jadu kolija. Borog a salo aswkkhe hamjakha chini Tripura hasteni Tiprasarogni o kwchamkuk Jadu Kolija no ang sawi sabaiya. Tei abono karwini jephuru ang rwchapbo aphuru nainairogbo belai hamjakha chini o kwchamkuk Jadu Kolija no.
Nini langmani yapri bahaikhe tei buphuru sekha?
Ang cheraiphuruni simi rwchapna swrwngkha tei ani amabo khoroksa All India Radio, Tv Artist. Aboni bagwi teibo rwchapmungo gwdalnani nangkha. Ang jephuru class two o porio aphuruno chini kami ni (Mohanpur) bwkhak rwchapmungbo swrwngkha. Phiya rwchapmung swrwngya sani mungsa sawi manya tongmani Sa, Re, Ga, Ma,Pa, Dha, Ni, Sa, tamo? Abobo kok soi swrwngte swrwngte joto samungrog sawi mano abo bahai bobotwi. Kwcharo ani phani(Father) langma chowi thango tei jeswk mansak ani amabo ano rwchapmung hamjago hwnwi rwchapmung phwrwngwino tongo. Phiya pha(Father) thwimani ulo kisa jwngjalbo achaikha nukhungo. Aboni ulono classical classs akorogo thangwi manliya eba mwthakna nangkha. Haiphano chini moyalni School, Block Level, District Level, State Level ni pandarog khwlaiwi 1st, 2nd, Position mankha. Jephuru ang Madhyamik passed wngo aphuru ani ama Agartala admission khwlaiwi rwkha. Sathai kwlaio ani kamini Tanuja Debbarma tei Braja Kishore Debbarma saphaio kaisa Tripura Tribal State Academy of Culture rwchapmung phwrwngo,aro rwchapmung swrwngkha bisiknwi romwi. Aboni ulo Tripura University o bisik tham khwlaikha Diploma. Aro paimani ulo ani ama ano Khumulwng(TTAADC) admission khwlaiwi rwkha bisiktham ni bagwi Degree. Paithago B.Ed khaimani ulo teisa Master Degree khaikha.
Nini nukhugni kisa sinimung rwkhe?
Ama ni mung Sujata Debbarma, Pha thwijak Sachindra Debbarma, kami Hezamara(Tripura).
Nini khungni borok nono bahai nukna muchungmani tei borogni bwkhano supungwi da mankha?
Ang tabuk rwchapmung o twiwi kaisa Bharat ha kotorni Ustad Bismillah Khan award mankhaba tei khatungnani kok. Abono khwnai ani nukhungni bororok tei Tripura hasteni lukurogbo belai bolaikha tei hambai yapharlaikha ano. Tei khaksa bwkhak ani aswk kotorma manmung manmano twiwi kwthang tongsanani abohai kaham koktwma khwnarwui mankha ani ama tei nukhungo aboni swlai kotor tei tamo tong.
Nini naharmung ?
Ani naharmung wngkha rwchapmungno twiwino wansukjak.
Nini award manmani uklogo sabo tong hwnwi chong?
Puila hinkhe ang ani ama no hwnwi ang wansugo tangwi hinkhe bose ano puila phwrwngnaiba tei abono simiya ani kamini bororokbo ano belai chubachu khwlaikha, Tripura Tribal State Academy of Culture ni Sir Madam khumulwngni sir madam tei ani guruji songno belaikha kha kaham yapharo. Tabuksak jora borokni phwrwngmungbaino ang aswk joratwi o thaio sokphai mankha. ani o bwthai manmani uklogo kwbangma borokni yak tongo, abo sawi saibaiya.
Nwngkhe tangwi modern rwchapmung rwchapyawi Folk rwchapmungno sawi naharkha?
Folk music no hamjakmanikhe abo chini Tripurani rwchapmung chini hukumu mukumu ni rwchapmung. Abono ang mungsatwiphano sokomorna muchungya, aboni bagwi tabuk chini sikla siklirogni bisingo Jadu kolija rwchapmungrogno rwchapnai aswk kwrwi no hwnwi mano. aboni bagwino abono rwchapna wngthwng ang joto nono koina muchungo teibo chini Tripura dophani rwchapkwrwngrogno tei hukumu mukumuno teibo kuchugo tisana wngthun.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.
Comments