Tripura hasteni laibuma rwkjak kokthoma nw rwgwi sawani thang khe chwng chini hwijak kothoma rok tei bw khursajagwi phaio. Omo haikheno chini tangmung twimung tei Bolang halongni manwi khuknwi baino aghio aswk nw langma nukhungni samung humung samungw phunang thani o yakbai swnamjak manwi rogno nw samungw phunang phaibai jao Borok Dopha rok. Borok Dopha hinwi nw chwng kok nw bw kokborok kok salaio, Phiya jora haiya kheba Mol swlai jakte jakte sakno Tiprasa hinwi bw sinimung yaphar laima nwk jagwi tongw. Omo haikhe Nukhung bwma haiya khe ba sakni sajwk hinjaknai rok nukhungw kwrak khaithanio Twi khokwani bangwi Tising manwi ni bisingtwi kwlaio kwbang twi khogwi manu hinwi nw srisiti ni simi nw samungw phunang jagwi tabok swk jora phaikha. Baksa Kokborok sanai bisingw phanu mung dalbidal bai rowi tongma nwk jagw. Phiya chung tini Jamatia Bosang rokni Tising bahai khe samungw phunang jagwi tongkhw bono nw sukrupwi sai manlainai.
Lakshmi Pati Jamatia sakha bwrwi rokni nangkwk mani manwi nw tising - Bol nawani tei twi khok wani bangwi. Waisa Tising kwtal nw samungw phunangkha hinkhe bw bisi tham (3) ni simi bisibwrwi rok (4) rok samungw phunangwi manu. Wa bai swnam jakni bangwi o Tising nw teisa kwtal khaiwi swnamwi manao. Bw tei bw sakha Tising nogo kainwi kaitham jekhe phanu phunang jagwi tongw. Tising nw kwbangma samungw phunangwi tongw borog Mwi kholthanio - Twi khokthani, Bol nathanio tei kwbangma samwngw phunangwi tongw - bw tei bw sakha tisingw manwi khoknwi dawi mahing khe yak bwkcha tongma haikhe ma tongw. Tisingnw bwrwi borok roknw kwbangma samungw phunangma nwk jagw - borog bono khorogw ri rowinai horgw. Bw sakha agheni Mol nisimi nw o Tisingni samungnw phunangwi phaijak mani. Aghiwo je samung Nai Bura rachi phwrwngwi toi phaimanu nw borog bw rwngkha hinwi sakha Lakshmi Pati Jamatia. Phiya Kokborok kok sanai bisingw phanu kisa misa Tising ni bumul o pher laimung tongw - Reang rok hinkhe Tising nw - Twilangha hinwi mung pharwi tongw. Reang rok hinkhe Jamatia Bosang rokni sai kisa chikon khaiwi Tising eba Twilangha nw swnamo Jamatia Bosangni hinkhe kisa kolok. Phiya Tising swnam thanio bw jora nangw omo haikhe kwbangma kami amchai rogno wani samung tang kwrwng rok kwrwi khanu hinwi manu, Lakshmi Pati tei bw sakha Tising nw tabok je swnam kwrwng rokni thani nw paiwi ma nahar jao. Tabok kaisa kaisa Tising 300 taka khaiwi ma paio luku rok.
Kami ni Tising swnam kwrwng eba Wani samwng swnam kwrwng Pabitra Mohan Jamatia sakha thung wa nw swnam manya Tising hinwi, Wanal wa bai hinkhe tising belaino kaham khe swnamwi manu phiya watwi wabai hikhe tising kisa phanu hamya tangwi hinkhe kwdwk tikiya hinwi - wamulwi wa bai hinkhe hamo haiphanu kisa besne bangwi hinwi sakha Pabita Mohan Jamatia.
Pabita Mohan Jamatia sakha tabokni jora bwswk aji mung rok phai hinwi - bw sakha boni bisi bangwi faima bai bw yakthagwi tongwa mwchwkya ni bangwi nw omo wani samwngnw khaiwi ma tong khw. Tabokni jorao wa bw aswk mathok liya bolang halongw tei jeswk jora nangw jora nangma swk ajimung manya. Warwk wani kisa phanu ajimung phaiya haiphanu khulaiwi tongw bw. Kaisa Tising wa thanio salnwi rok nangwi thangw phiya phalna phro khe 300 taka simi nw mano hinwi nw bw ajimung phaiya hinwi sakha. 300 taka rang rok tabok salni ajimung swk sanu ungw ya hinwi sakha Pabitra Mohan Jamatia. Bw wani samung bebak nw no khaiwi tongw langha, socheng, yangkhung tei bw tongw daalbidal manwi khuknwi rok.
Tabok ni jorani borok rok wani manwi khuknwi kisa phanu swnamna rwngliya. Thinangw belaini kesewi thangnai sakni Hukumu Mukumu nw narwkna. Tabokni jorani sikla tei sikli roknw bw warwk chirwani tei Tising swnawani, langha, waying, kisi dalbidal. Phiya tabok jorale kamio tabok phanu khorokba khorokdok le kwrwng tongbai jakhw wani manwi khuknwi swnam kwrwng.
"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"
Comments