Tripura-o Tong Nai Jamatia Rokni Shraddo Eba Khasamwng Panda No Saimanlai Nai

Shraddo phuro mwtaai aatai rokno muito makhaiwo

Hayung gwnang gwi palaijak faimani mang thwi mani yagulo khasamwng panda eba shraddo. Kaisa dophani raida tei kaisa dopha bai solaiya wngwi manw, fiya jotto nukhung gonw salsaya salsa khasamwng pada khlai jak gw. Chwng saiman lainai Jamatia rok bahai khe shraddo palai.

Thwi thaangnai borok ni bwsalarok khe mathluk ma ungo

Borok thwimani yagulo chitham ni sal go sraddo palai jakgo. Santai rok tei bwsa bwtwi rok chitham jora nerasi machawo, tei bwsajwk nukhung khajak rok kheba sal tham jora nerasi machawo. Chitham jora bwswla rok juta (shoes) mathuya, bwkhwnai makhalya, tei hawo bo thuyam swnam rojakkhe simise mathuwo.

Chinwini horgo busuk bwthai rok sikla baya thunlaiwoi awaan suklai wo rwsa romo go tei awaan bora swnam laiwo. Chwla kwnwi bwrwi kwnwi khe awaan suklaiwo tei kwthar awaan bwthai maswnamo makhwlai barokjaknani bagoi. Boni yagulo sikla rok kwkha sung laiwo. O kwkha bai awaan bora chawui no nerasi mabai wo chithamni sal go. Tei chinwini horgo shri Krishna ni mwngwi Giri kailai gwi aiyasak jora okwra chakra rok mwtaini mwngbai thwinaini phola hamari malangthwng hwnwi sonkitan eba kirton rolaiwo.

Chithamni phung aikhe nukhungni borok rok ochai bai khe thwinai ni phola biyal khe tama tong lang thwng hwnwi kentha-kobong, aina-betra, ri-chum (clothes), maitwk mwitwk, ata-kathi, juta, mairung mwithai rok boklai jagw tei joigo soklai gw. Jaiti gusti bwini parani fainai rokno kheba para borok rok yakung susok go. Jotto faibai mani yagulo phundiporo bwsa rok makhwlai barok gwi thwi thaangnai no chariwo.

Thwi thaangnai borok ni phola machaya matongya wngthung hinoi chamung nungmung yaphar jago

Phola kwthaar no ri-chum bo rilaiwo

Maikhwlai barok baimani yagulo santai gusti rok nokhwla go kitingwi achok laigw tei kwkha bai awaan bora chawoi nerasi baiwo. Boni yagulo ochai durpani ayuk magwi, khul bai baksa bwkhwnai furgwi, holong swk thaluk rakgwi matong jalang thwng do hwnwi holong tok gw jotto ni bokhrok gana go tei khwtwng kwthar bai dosi swnam gwi khunju ber rogo. Lukuni borok rok Baksa kheba maimwi sunglai fai baigw tei baksa kheba maimwi bok gwi diporni chamwng charo gw.

Haikheno Jamatia dopha go khasamwng pada eba shrado palai jakgwi faikha.

This article represents the intellectual knowledge of the Jamatia community of Tripura. It has been created as a part of the Adivasi Awaaz project, with the support of Misereor and Prayog Samaj Sevi Sanstha.