Tripura haste ungkha chikonsa haste ora kwbangma boroknw tongw baksa kokborok sanai borok bosang, baksa bangla kok sanai bosang tei kwbangma juda juda bosangni borok rok. Ora kubun haste rokni hai aswk Industry kotor kotor kwrwini bangwi samwng hwmwngni kisa biyal nw hinwi manu. Ora basing o kwbangma Sikla sikli roknw tabok phanu samwng rwtwgwinai thangbaio kubun hasteo. Phiya tabok kwtal jora bai mwchangwinai Kwbnagma Tripura hasteni Tiprasa bosang rok jora bai yapri sepna swrwngna chengma nwk jagwi tongkha tabok. Omo haasteni Sikli khoroksa bwkhukjwk yakbara jora nw phunangna chengkha aji mwngni sep, swnam kha Achar ni brand, manthokha Aguli Hathi o - Bw kharoksa phurwngnai jwk phiya yakbara jorao nw phunang kha samwng kwtal tei ajimwngw yak phuwar kha Samlia Debbarma.
Samlia Debbarma sakha bw tabak bw Kaisa privet school o nw phwrwngwi tong o hinwi, Bahai khe boni Achar ni baniyan o yak kwrwng kha Hinwi tei bw sai mankha- puila o borog nok kaisa nw haino Achar khaiwi chalaima joto nukhungni borok roknw belaino kaham kok phirokmwng manma bai Kaisa kwtal wanswkmwng achaikha. Samlia Debbarma aghini siminw “Cooking” haiya Kheba sungmwng-twimungnw belainw hamjakma bai nw omo hai samwngw yak phuwarwi manjakha. Jotoni sai boni Hanok tei phayung ni kaham kokphirok mabaino boni tei bw khathangsawi phaikha. Boni Mwnai sakha bai tangwi nwng omo nw Hati o tikhlai ya, hatio Phalkhe belai khe nangnai hinwi - chwngsi aswk thokjakha hinkhe bwibo aswk nw thokjak nai hinwi sajakma baino tini kaisa mwng swnamwi tongkha bw.
Nukhungni boroknw bo achar nw swnamwi puila charomabai borog aswk kok phirok mwng ma rokha?
Samila sakha bw puila “Chicken Pickles” khaiwi charo mani abono Hit ungwi thangkha nogo nw, aboni yakulo Mosa bilatini achar rok, wok bahan achar rok tei kwbangma dalbidal swnamna chengkha bw, kubun achar nw bw aswknw thokjakha borog.
Hatio puila nokharna hinkhe tamo khaina nang?
Puila Hati nok haiya hokhe bazar ba market o Nakhar Ronai hinkhe jotonw Bharat hakotorni raida bai swnam jak chamwngni manwi khuknwi tikhlai nai hinkhe hati o jekhe phanu nangnai “Food Licences” tei kaisa nang Wanu “Trade licences. Abono karwi bw tei bw sakha Hati o tikhlaina hinkhe kaisa manwi khuknwi nw “Brand” swnamna nangnai hinwi tei Advisement bw nangnai Hinwi. Bw tei bw sakha molnw social media mol hinkhe Social media bai kwrwngwi sakni manwi nw Social Media o Upload khaiwinai tei bw promote haiyakheba awai wimanu, tei Luku roknw tei bw Information rowi manu.
Kaibwswk Dalbidalni Achar manthok nini thanio?
Samlia Debbarma ni thanio tabok 11 Varieties ni achar manthogw Hinwi sakha bw. Wok, Tok-ha tei Mwikhumu tei Akra achar tei kwbangma manthogo boni thanio. Boni Acharni bisingw jotoni sai phalnwi manu Tok baha achar, boni yakulo wok bahan achar, tei hinkhe Miya achar. Tabok o achar nw paina thangkhe boro manthoknai? - puila bw Kaami Caffe o phalna chengmani, aboni yakulo kheno luku rok tei bw sawi mankha tei kwbangma borokni tei bw order manna chengkha tei kubun hati nok rogo bw phalna sep yaphar jakha bw. Samlia Debbarma sakha tabok Tripura hasteo tabok boni “Borok Pickles and More” joto thaio nw manthokha hinwi. Agartala hati kotor kotor rogo bw manthokna chengkha tei boni kaisa Online store bw tongw. Boni achar ni rang mari rok ungkha 90gram ni Chicken pickle hinkhe 130 Rupee tei Pork Pickles hinkhe 100gram 170 Rupee rangmari bai bw hatio phalwi tongw.
O Business chengthanio bwswk Investment rok nangkhana?
Samlia Debbarma sakha bw o Business nw zero investment ni Simi chengmani puila kisa baino aboni yakulo luku rok kaham feedback's mabainw bw tei bw khathangma manwi samwngnw tei bw yak phuwarkha. Borok boni achar nw paibaina chengkhe nw bw o rang bai nw tei bw boni Business nw phuwarna chengjakha. Bw achar ni packet khaithanio bo, bw sakni nogo nw sakbaithangnw khaio, Kwchang khe tongrona bangwi kaisa kwchang khaijaknai machine tei Pocket ni manwi khuknwi siminw nangw. Tei boni nokni borok rok bw kisa misa Chubawi tongw. Boni Achar mangso achar rok hinkhe taltham (3)rok tongw tei mwikuthung achar rok hinkhe Taldhok (6) rok narwk chawi manu.
Online ni bisingtwi khe phalwi de man?
Samlia Debbarma ni Kaisa Online store site bw swnam jak tongw - luku rok chajagwi online twi manwi paikha hinkhe borok bono Delivery ni rang Mari thepawi Nai customer ni ora rohoro. Borogni site twi Tripurani simiya phatar hasteni Luku rok bw aswk nw hamjagwi manwi order khaio Hinwi khatung mani bisingtwi sakha Samlia Debbarma.
Borok ni “Borok Pickles and More” Brand nw chengmani thangnai 2021 bisini simi nw chenglaimani, Phiya tabok belainw luku rokni khugw sinimwng manwi tongkha jora kisani bisingw phanu. Bo Masing jora nw kwbang Achar swnamo tomani hinkhe masing jorao nw kwbang luku rok pai chana hamjak kwk o.
Samlia Debbarma tei bw sakha achar swnam na bwswk salni bisingw swnam man - bw sakha achar nw kwdwk swnamna jorao tongro khe tei bw Thogo tei kaisa achar swnam thanio bw salbwrwi (4) rok bw jora naharwi swnamo. Bw joto Achar swnam Thani nangkwk manio bw mangnw sakbaithang swnamwi tongw, Tei Online order rohor thani rogo khe nukhungni borok rok. Boni tabok Aghini sai tabok tei kisa phalmwng rogo kwchwk kama nwk jak tongkha.
Tangwi bo Acharni mwng Borok mwng nahar Kha?
Borok mwng ungkha kaisa Kokborok sanai dopha rokni mwng, O mwng ungkha Tripura hasteni bukungbara rokni Sinimwng. Ora tongw kwbangma Hamjakmwng sakbai sakni nw tei bisingw sinilaimwng Halok nw naharwi nw borog borokni acharni mwng phar laikha “ Borok Pickles and More” Hinwi Samlia Debbarma ni hanok Bubar Debbarma ni Khuk phangbainw o mungnarwk laikha borok.
Samlia Debbarma boni o brand nw tei bw kwchwk Tisana bangwi tei bw saktharmwng narwk nai tei bono boni imang. Omo haikhe nw joranw swbaiyawi kaisa samwng dophani mwng hinwi nw omo haikhe Tiprasa rokni sinimwngnw yakphuwarna jotonw phaidi hinwi phunukmari narwk kha o Bukhukjwk.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.
Comments